بحلاتك مااشوف وماضكت دوم
بحلاتك ماكو صدك بس حلاتك
عاقل من تمر بس انه مجنون
واعقل من تلفني انته بعباتك
اموت انه من اعوفك تعرف بهاي؟
لان مالكه واحد من صفاتك
ماتدري بغلاتك!عندي معذور
ولكن اعرف انه اشكد غلاتك
غالي وفدوه عمري لعينك ايروح
وكون بعمري تنسد مشتراتك
ماشفت بحلاتك حته بالطيف
وحته الطيف داخ بذكرياتك
ابد مابيك لوله وكلشي مابيك
وصفاتك ادري غارت من صفاتك
شوصف بيك بالله وشحسب اوصاف
اغلط من اعدن معجزاتك !!
امس بالمكبره لمن تعديت
الموته اظاهرت رادت مماتك
جمالك للجمال انصاغ دستور
ومشيتك دونت كل منجزاتك
يالموحد الدنيه وكل الاديان
المسيح استسلمت شافت صلاتك
تمره ومن حلاتك تشرك الناس
وكلك تنوكل حته ابنواتك
من تزعل احبك وكلب الكون
ومن عدك اريدن بس رضاتك
احلف بيك كدام الخلك دوم
وكمت بعيونك اقسم وبحياتك
ياجيش الجمال الخوف اجيوش
مطوع لون تقبلني ابمشاتك
فدوه اعيوني لجلك خايب اتروح
بس باوع عليه امشهاتك
اصوم انه ابدالك قربه لله
اخافن يوم من الصوم فاتك